ভ্ৰম

মই ভবাৰ দৰে ;

     সকলোবোৰ সহজ নাছিল

     সুচল নাছিল মোৰ যাত্ৰা 

এটি ভুলৰ বাবে ,

হেজাৰ ভুলৰ পৰিধিত

      আজি দগ্ধ মই !

সৃষ্টি কৰিলো

অলেখ কৃত্ৰিমতা

য'ত নাই কোনো মোৰ অস্তিত্ব,

আৰম্ভণিৰ উৎস বিচাৰি

পাৰ হ'ল শত বসন্ত

কি যে অদ্ভুত ভ্ৰম এয়া !

তথাপি, কিয় অস্থিৰ মই ?

কেতিয়াবা এনে লাগে যেন

   কিবা এটা আকৌ ঘটিব ;

'য'ত আৰম্ভণি ; তাতেই অন্ত'

জন্ম আৰু মৃত্যুৰ মাজৰ

     এয়াই জীৱনচক্ৰ

এফালে যদি পোহৰ , আনফালে এন্ধাৰ

এই খেলখনৰ তুমি

কাৰ পক্ষ ল'বা ?

প্ৰকৃত সংযোগী, আজিও অদৃশ্য,

চকুৰ আগত ভাঁহি থাকে 

    মাথোঁ এটি অবুজ প্ৰশ্ন !

~ মনোজ