বিহঙ্গম

তোমাৰ দৃষ্টি বিহঙ্গম

মোৰ নিৰ্মম হৃদয়ত

     খলকনি জগাব পৰা 

এটি আশাৰ স্বৰগম ;

ছন্দৰ জগতখন তোমাৰ কেনেকুৱা লাগে ?

চাবাচোন,

  এটা শাৰীৰ সৈতে আনটোৰ অন্তিম মিলন ;

এনে লাগে যেন, এটি স্বৰৰ এনাজৰী বৈ যায়

    হৃদয়ৰ সীমনাইদি ...

কবিতা মোৰ স্বতঃস্ফূৰ্ত

নিভাঁজ অনুভূতিৰ সূক্ষ্ম বিশ্লেষণ

   য'ত মই,

কৃত্ৰিমতাৰ স্থান দিব নিবিচাৰোঁ

যান্ত্ৰিকতাৰ ছাঁ পেলাব নোখোজোঁ !

  মই বিচাৰোঁ,

এখন নদীৰ দৰে বৈ যাওঁক

সৃষ্টি কৰক সপ্ত সুৰৰ কলৰৱ !

.....

তুমি হয়তো বুজি উঠিলা

মই যে নিষ্ঠুৰ নহয়,

মোৰ আশাবোৰে...নোপোৱাৰ বিষাদবোৰে

কেতিয়াবা বৰ আমনি কৰে

পাগল কৰি তুলে,

অজানিতে কৰা ভুলৰ বাবে

মোক ক্ষমা কৰিব পাৰিবানে ?

   মাথোঁ এবাৰ .....

@ মনোজ