বগা ফুল , কলা ৰং

                                (১)

মোৰ ঘৰৰ পিৰালিত এপাহ ফুল ফুলিছে

বগা ফুল ,

সেউজীয়াৰ আঁৰত তাৰ গোপন অভিসাৰ

দুৱাৰদলিত এছাটি বতাহে বাৰে-বাৰে টুকুৰিয়াইছে

ফুলপাহ থৰ-থৰকৈ কঁপিছে ,

শীতৰ সেই নিশাটিৰ দৰে 

এপাহ ফুল ফুলিছে ,

বগা ফুল ...

                                 (২)

মোৰ চৌপাশে এচমকা আনন্দৰ কোলাহল ,

শ্ৰেষ্ঠত্ব প্ৰদৰ্শনৰ প্ৰাৰম্ভিক আখৰা

কিছু সংশয় , কিছু উত্তেজনা

ক্ষমতা বিচৰাজনৰ দৃষ্টি জল-মল

বিশ্বাসীজনৰ শীৰ্ণ সমিধান ,

এচমকা আনন্দৰ কোলাহল ...

                                   (৩)

ফুলপাহৰ বুকুত এটা ক'লা পখিলা

গ্ৰাস কৰি পেলাব খুজিছে শান্তিৰ মগ্নতা

কোলাহলবোৰ লাহেকৈ কমি আহিল

বতাহছাটিও নোহোৱা হ'ল

সময়ৰ ধূলিত ছাতি-ফুটি কৰিছে দিক-বিদিক

ফুলৰ পাহিকেইটা নীৰৱে সৰি পৰিল ,

এতিয়া মাথোঁ এন্ধাৰ 

 চৌদিশে কেৱল ক'লা ৰং ...

.

.

.

.

.মনোজ