বিষাদ

আজি আকাশখনৰ বিষাদ ,

আকাশৰ কোলাত মেঘবোৰে উচপিচাই আছে

এডাল বিদ্যুৎসর্পই বাট হেৰুৱাই

ফালি চিৰা-চিৰ্ কৰিছে মেঘৰ অৰ্ধসিক্ত বুকুখন ,

ফাগুনে ধুই নিয়া পলাশ-মদাৰৰ সিৰাই-সিৰাই

এতিয়া কেৱল বিষাদৰ গান ;

সৌৱা , মোৰ স্বপ্ন-নগৰীৰ দাঁতিত 

এজুপি নাহৰ ফুলিছে ,

ফুলবোৰে দেখোন আমনজিমনকৈ 

                           মোলৈকে চাইছে

নাহৰৰ ভাঁজে-ভাঁজে এটি চঞ্চল দহিকতৰাৰ

                             নীৰৱ ধ্যান ,

বুজিছা অৰুন্ধতী !

আজি সকলোৰে বিষাদ ...

ৰাতিলৈ এজাক ধুমুহা বলিব নিশ্চয়

জোকাৰি যাব চহৰৰ প্ৰতিটো অলিবাট

মই ধুমুহাজাকক চিঞৰি ক'ম ,

" মচি নে মোৰ বিষাদৰ দুখনি ভাৰ

মচি নে মোক ,

মচি নে..."

.

.

.

.

.

মনোজ