কোন দিশে ?

নিশা দুপৰ হ'ল

সাৰে আছোঁ মই

সাৰে আছে হাবি পোৰা ছাইখিনি,

মোৰ চকুপানীবোৰ শুকাই কৰাল বান্ধিছে ;

এটা চৰাইৰ মাতত নীৰৱতাৰ তন্দ্ৰালি ভাঙিছে,

বা-মাৰলী এজাকৰ কূটাঘাতত 

     কৰবীৰ হালধীয়াখিনি হীম হৈ গলিছে,

পোৰা মঙহৰ গোন্ধ এটাই দশোদিশ ভেদিছে,

হাবিখন দপ্-দপাই জ্বলিছে !

উঁইপৰুৱাৰ জাকটোৱে বালিত মুখ লুকুৱাইছে

চিফুঙৰ সুৰ এটিয়ে অমানিশাক সাৱটি লৈছে,

আঘোণৰ পথাৰখন দীঘে-বাগিয়ে ফাটিছে,

আকাশৰ বুকুয়েদি এটোপাল বৰষুণ

       তেজ হৈ বিৰিঙিছে,

মোৰ কলিজাৰ তেজখিনিয়ে মৃত্যুৰ ডিঙা সাজিছে

হাবিখন পুৰি ছাই হৈ পৰিছে ।

.

.

.

@মনোজ